Arci Munoz: Ginebra's Calendar Girl and Muse

IPINAKILALA na sa mga taga-midya ang bagong calendar girl ng Ginebra San Miguel Inc. (GSMI) para sa taong 2016—ang aktres, modelo at mangaawit na si Arci Muñoz.

Kahanay na ngayon ni Arci ang mga sikat na beauty queen, modelo at aktres na naging Ginebra San Miguel Calendar Girl tulad ng two-time calendar girl na si Marian Rivera (2009 at 2014), Anne Curtis (2011), Solenn Heussaff (2012), Georgina Wilson (2013), Angelica Panganiban (2007), at ang kasamahan ni Arci sa Pasion de Amor na si Ellen Adarna na naging calendar girl nitong taon lamang.

Naglalabas na ang Ginebra San Miguel ng kalendaryo mula pa noong 1988. Ngayong taon, “A day in the life” ang tema.

  “Napili namin si Arci dahil tugma ang kanyang personalidad sa Ginebra San Miguel. Tulad ng Ginebra San Miguel, si Arci ay maabilidad, maganda, matalino, hindi umuurong sa mga pagsubok at talaga namang ‘ganado sa buhay’,” ani GSMI Vice President at Marketing Manager Nelson Elises.

Nagtapos ng kursong Theater Arts sa Unibersidad ng Pilipinas, pumasok si Arci sa show biz noong 2005 bilang kalahok sa isang talent reality search na Starstruck ng GMA. Bukod sa pag-arte sa telebisyon, lead vocalist din si Arci ng rock band na Philia. Naging pambato rin siya ng Pilipinas sa Asia Supermodel Competition noong 2008. Ngayon, isa si Arci sa mga bida sa Pasion de Amor ng ABS-CBN. Kasama rin siya sa pelikulang Etiquette for Mistresses.

“Isang napakalaking karangalan ang mapabilang sa pamilya ng Ginebra San Miguel. Sobra akong nag-enjoy sa paggawa ng Ginebra San Miguel calendar. Masaya ako sa kinalabasan nito na ipinapakita kung sino si Arci Muñoz sa likod ng kamera. Kumbaga, ang mga Ginebra San Miguel calendars ko ay pasilip sa aking buhay. Marami ang hindi nakakaalam na athletic ako, nagwo-work out at naglalaro ng basketball. Rocker ako pero mahilig din sa mga girly things tulad ng fashion,” ani Arci.

Dinagdag pa niya: “This is my first endorsement after I joined Starstruck. At sobrang thankful ko sa Ginebra, at sobrang bait nila, na-meet ko na sila noon pero bata pa ko noon haha… nataon pa ito kasabay ng Pasion de Amor napro-promote na rin kasabay nito.”

Magiging bukas at handa na rin si Arci sa mga proyektong may daring na roles matapos ang seksing endorsement nito sa Ginebra at sa kasalukuyan nitong palabas sa ABS CBN.

Si Arci Munoz din ang Muse ng Ginebra sa opening ng PBA sa Oktubre 21, 2015.

May bagong gimik ang Ginebra San Miguel para sa nais makakuha ng 2016 calendar. Sa kada dalawang bote ng Ginebra San Miguel Bilog, Angelito, Frasquito o isang bote ng Kwatro Kantos na mabibili sa 7Eleven, MiniStop, at iba pang participating outlets, makakakuha ang mga mamimili ng limited edition magazine calendar na may kasamang mga “Ganado coupons” na maaring ipagpalit ng diskwento o premium merchandise items.

Published on Inquirer Libre September 30, 2015