Malaki ang matitipid kung mahusay ang gamit

 

Daikiri Mihara, Presidente ng Honda Philippines habang sakay ang bagong Honda TMX Supremo

DIEGO MARIANO, INQUIRER

MAY MAGANDANG balita si Elie Salamangkit, product planning and development manager ng Honda Philippines sa mga nagmamaneho ng tricycle sa Novaliches.

“P10,000 halaga ng gasolina ang matitipid sa isang taon,” aniya sa paglunsad ng 2nd Generation TMX Supremo ng Honda Philippines.

Maaring mapagastos sa unang pagbili ng bagong kagamitan, pero kung ang mas mahusay ang bagong kagamitan na ito kung ihahambing sa kasalukuyang lumang kagamitan, maituturing itong “sulit.” Tinatawag itong “long-term investment,” mapapagastos sa una pero sa pagtagal mas mararamdaman ang katipirang dulot ng mas mabisang kagamitan.

“Marami ka nang mabibili sa halagang P10,000,” sinabi ni Salamangkit. Kung ihahambing sa ibang tatak ng motor na pampasada, mas matipid sa gasolina ang bagong TMX Supremo ng Honda dahil mas angkop ang 5 Speed-150cc makina ng Supremo sa mabigatang trabaho, “work horse” kumbaga.

Ngunit kahit ginawang pampasada ang motor na ito, hindi pa rin mawawala ang pagiging komportable at elegante nito. Sa bagong TMX, mas pinaganda ng Honda ang tangke nito na may eleganteng sticker at ginawang flat ang upuan sa likod upang maging mas angkop sa upong pang “backride.”

“Lulutong at hihina ang bakal kapag mali ang timpla ng bakal sa tuwing ito ay winewelding,” pinaliwanag ni Salamangkit makaraang ipakita sa mga tsuper ang madaling pagkabit ng sidecar sa motor nang wala pang tatlong minuto, dahil sa nakaabang na kabitan na nasa motor na mismo.

Hindi lang makatitipid sa gasolina ang pamumuhunan sa isang bagay na episyente tulad ng Supremo, makatitiyak din ito sa seguridad ng mga ari-arian at sa kaligtasan ng mga mayari. May mga katangiang pangseguridad at pangkaligtasan ang bagong Supremo.

“Mahihirapan ang mga magnanakaw dito,” patawang sinabi ni Salamangkit. Taglay ng bagong Supremo ang “Secured Key Shutter” kung saan walang sinuman ang makakapagpasok ng kahit anong susi sa susian sa tuwing iiwanan ng tsuper ang tricycle niya sapagkat mayroon itong takip nasasara sa tuwing aalisin ang susi. “Kahit ang kapitbahay mong may Supremo hindi rin ito mbubuksan,” aniya.

Mayroon din itong “Integrated Handle Bar Lock” kung saan sa oras na i-lock ng tsuper ang manibela sa anumang ayos ay mananatili ito hanggang sa balikan ito ng tsuper. At ang “Passing Light” kung saan may kakayahan ang motor na i-todo ang ilaw o headlight nito upang mapansin ng tsuper na nasa unahan na may mag-o-overtake sa kaniya, upang maging ligtas ang biyahe at ang pasahero nito.

Sa pamumuhunan sa mga mahusay na kagamitan, tulad ng motor na may mga ganitong katangian, maiiwasan ang mga aberya at sakuna. Malaki ang matitipid ng isang tsuper sa pera at sa oras, at maraming buhay ang maliligtas.

Published on Inquirer Libre August 6, 2015